Елімізде глаукома дертіне шалдыққандарға арналған мобильді қосымша қосылды

Суқараңғы (глаукома) – көздің ішкі қысымының жоғары көтерілуінен болатын созылмалы көз ауруы. Глаукома – көзден сулы ылғалдың шығуының бұзылуымен, көзішілік қысымның жоғарылауымен, көру жүйкесінің атрофиясымен және көру қызметінің үдемелі төмендеуімен жүретін аурулар тобы. Суқараңғы 40 – 50 жастағы адамдар арасында пайда болады, кей жағдайларда жас балаларда (іштен туа біткен) және жасөспірімдерде кездеседі. Аурудың бастапқы кезеңінде көздің алды тұманданып, жарыққа қарағанда, «кемпірқосақты» көргендей белгілер байқалады. Глаукома - көз ауруларының ішінде ең көп тараған аурулардың бірі. Оны емдеудің және алдын алудың жолы қандай? Медицина ғылымдарының кандидаты, көз дәрігері Әсел Байдәулетқызы Алматы студиясының қонағы болып, осы және басқа сауалдарға жауап берді. «Глаукома қайтымсыз соқырлықтың негізгі себептерінің бірі болып табылады. Мәліметтерге сүйенсек, әлем бойынша 64 млн-нан астам адам осы науқасқа шалдыққан. Ал, 2020 жылы бұл сан 76 млн-ға өсуі мүмкін. Біздің елде ресми дерек бойынша 68 мың адам осы ауруға шалдыққан. Ол шынында ол екі есе көбірек болуы мүмкін. Бұл аурудың алғашқы кезеңде белгілері болмайды. Немесе науқас ол белгілерге мән бермейді. Адамның көзі, басы аурырып, көзге сұйықтық толуы мүмкін. 40-тан асқан адам жылына бір рет көз қысымын өлшету керек. Глаукоманың 60-тан аса түрі және ол тұқым қуалайды. Цифрлық медицина аясында қарапайым халыққа медицинаны қолжетімді ету жағынан жұмыстар жасалуда. Дәрігер мен науқасқа көмекке келетін дүниенің бірі – глаукома дертіне шалдыққанға арналған мобильді қосымша. Бұл мобильдік қосымша дәрігердің нұсқаулықтарын орындаумен қатар көз қысымын өлшеуге мүмкіндік береді», дейді дәрігер.