Елордада 26 наурыздан 5 сәуірге дейін жаңа емлені меңгеруге арналған курстар өтеді

Елордада 26 наурыздан 5 сәуірге дейін курстар өткізіледі. Курстың мақсаты, негізі неде? Елбасының тапсырмасына сәйкес, елімізде латын әліпбиіне көшу жұмысы басталып кетті. Сол атқарылар шаруалардың үлкен ауыртпашылығы «Тіл-Қазына» ұлттық ғылыми-практикалық орталығына түсті. Шайсұлтан Шаяхметов атындағы «Тіл-қазына» орталығы әдістеме басқармасының басшысы Айнұр Сейітбекова «Tansholpan»-ның қонағы болып, латын негізді қазақ жазуына қатысты сұхбат берді. «Елімізде жаңа емле ережелері мақұлданды. Оқу әдістері қандай болады деген сауалдар туып жатыр. Жаңа емлені енгізуге байланысты қоғамды екі топқа бөлуге болады. Біріншілері - оқу-білім саласында жұмыс істейтін, оқитын оқушылар мен қызметкерлер. Олар күнделікті осы салада жүргендіктен олар үшін жаңа емле қиындық тудырмайды. Екінші топ – мұндай процеске қатысы жоқ сала мамандары. Осы мамандарды біз қамтып отыруымыз қажет. Біздің орталықтың мақсаты – осы салаға қатысы жоқ мамандар үшін білікті тренер дайындау. Ол орталық тіл мамандары, БАҚ, баспа, аудармашылар, ұлттық компания қызметкерлері. Курстың мақсаты - тренерлерді дайындап, елдің түпкір-түпкіріне жіберу. Олар әрі қарай қалау, аудан, ауыл тұрғындарын үйретіп шығады. Осындай курстар үшін арнайы оқулықтар жасалды. 2 аптадан тұратын 72 сағаттық курс бүгіннен басталды», дейді қонақ.