Бақытжан Мұңайтпасов: Өнер үшін туғанмын

Қазақтың қазыналы өнерінің бірі ән десек, қателеспейміз. Оның ең озық үлгісі ғана ғасырдан ғасырға жетеді. Ән өнері тек орындаушылық емес. Жүректен шыққан әсем әуезді әуен ғана өміршеңдігімен есте қалады. Дәл осындай туындылардың авторы, белгілі композитор Бақытжан Мұңайтпасов туралы 90-шы жылдардың ортасында көпшілік жиі еститін. Оның бірқатар әндері халықтың сүйікті әуендеріне айналып, түрлі сахналарда орындалып жүр. Ал, қазіргі уақытта өнер иесі қайда жүр? «Tansholpan»-ның тілшілері композитормен кездесіп, оның өмірі мен өнердегі жаңалықтары туралы біліп қайтты. «Өнерді тастауға уақыт жоқ. Өнер үшін туғанмын. Себебі өнерді, ән шығаруды, ән айтуды қатты ұнатамын. Мен музыкамен өстім. Мағжан Жұмабаевтың өлеңдеріне 7-8 ән жаздым. Қазір Мұқағали Мақатаевтың сөздеріне ән жаза бастадым. Жоспарда дуэт болып ән орындау бар», дейді өнер иесі. Танымал композитор қазақ халқының біртуар тұлғасы Қажымұқан палуанның ұрпағы. Әкесі Бақытжанды күресші болсын деп бала кезінен спортқа баулыған. Өнер иесі бала кезіндегі естеліктерімен бөлісті. Әкем спорт мектебінің директоры болған. Мені спортқа беріп, күресші болуымды қалаған. Қанша қатыстым да, жарақат та алдым, бірақ өнер деген тартып тұрады екен. Сегізінші сыныпты бітірген соң музыкалық колледжге бардым. Кейін әкем өзі күйсандық әперіп, мені әрқашан қолдады.