Люция Төлешова: Шәкірттерім менен асып кетсе, мен үшін үлкен ғанибет

Ол - көмейіне бұлбұл ұялаған әнші. Ол - өнерде ізбасарларын тәрбиелеп келе жатқан ардақты ұстаз. «Сіз қайда жүрсіз?» айдарының бүгінгі кейіпкері - ҚР Еңбек сіңірген әртісі Люция Төлешова. Люция Қажығалиқызы Чайковский атындағы училищенің түлегі, Мәскеу Мемлекеттік педагогикалық институтын тәмамдаған. Шығармашылық жолы театр сахнасында басталған өнер иесі кейін ұстаздық қызметке ауысқан. Студенттер үшін Люция Қажығалиқызының орны бөлек. Шәкіртерінің барлығы қазақ өнеріне үлкес қосып жүрген танымал жандар. Абай атындағы Қазақ Мемлекеттік академиялық «Опера және балет» театрында ұзақ жыл еңбек еткен әнші операларда басты рөлдерді сомдады. 1968 жылы «Гүлдер» ансамблі құрылғанда Люция Қажығалиқызы әншілердің даусын қойып, вокалдан дәріс өткізе бастаған. Кейін Мемлекеттік телерадиокомитет оркестірінің әншісі қызметіне арнайы шақырылып, талай туындыны таспаға жаздырды. Сол шығармалар Қазақ радиосының «Алтын қорын» толықтырды. Люция Қажығалиқызының репертуары қазақ, орыс, шетел композиторларының әндері мен романстарына бай. Қай шығарманы орындаса да, жүрекке жеткізе біледі. «Менен өткен әрбір әншінің тағдыры әртүрлі. Қалай болғанда да өз шәкірттерімді өте жақсы көремін. Оларды бөліп, жармаймын, олар өзіме туған баламдай. Шәкірттерім менен асып кетсе, мен үшін үлкен ғанибет. Мен шетел емес, ел ішінде жүріп, өлең айтқанды жақсы көремін. Халықтың қошеметін алып, олар сені қабылдаса, сол үлкен байлық», - дейді Люция Қажығалиқызы.