Жазушы Эрнест Төрехан: Мен үшін қол шапалақта дегенді ұнатпаймын

Тіл жанашыры, журналист, жазушы Эрнест Төрехан 75 жасқа толды. Әдебиет саласына келмес бұрын 60-шы жылдары құрылысшы мамандығын меңгерген бозбала Қазақ Мемлекеттік университетінде білім алған. 1963-1966 жылдары әскери борышын өтеп, кейін оқуын сырттай жалғастырды. Шығармашылық жолы «Лениншіл жас» газетінде басталған жас маман корректор, жауапты хатшының орынбасары, бөлім меңгерушісі қызметтерін атқарды. Торғай, Маңғыстау облыстары ашылғанда сол аймақтарға аттанып, мұнайшылардың өмірімен жақын танысты. Нәтижесінде көлемді шығармалар өмірге келді. Мәскеу Мемлекеттік университетінің философия факультетін тәмамдаған Эрнест Төрехан ұзақ жылдар бойы жазылым баспаларында, «Қазақфильм» киностудиясында жұмыс істеді. Қазақ тілі қоғамын құруға белсене араласып, ана тіліміздің аясын кеңейтуге үлесін қосты. Жазушының алғашқы кітабы «Хан тәңірі» 1978 жылы жарық көрді. Одан кейінгі «Алтын шеңбер», «Таудан түскен із», «Ескендір мен Роксана», «Алматыда күн ашық» шығармалары - қазақ әдебиетіне қосылған сүбелі дүниелер. «Бойымдағы қасиетім – дабыраны жақсы көрмеймін. Жалғыздықты ұнатамын. 70 жасымды саналы түрде атамадым. Оның үстіне, біреуді сүйреп, мен үшін қуан, қол шапалақта дегенді ұнатпаймын. Шын жазушы болсам, халық өзі шақырады. Кітап жазған соң айтатын ойың болу керек. Ойды жазатын нәрселер әлі көп. Керектілерін алдыға салып, екі роман жазып жатырмын», - дейді жазушы. «Таңшолпан» бағдарламасының ұжымы мерейтой иесін құттықтап қайтты.