Әдет-ғұрып: Ала жіптің не қасиеті бар?

Қазақ ала жіптің қасиетіне сенген. Айырықша әдемілігімен бірден көзге түсетін ала жіпті халқымыз көзден қорғайды деп сенген. Өмірде ақ пен қара бірге жүреді. Ала жіп те - сол ақ пен қараның, бар мен жоқтың бір бірінен ажырамайтындығының символы. Қазір ала жіпті тек тұсау кесетін бұйым ретінде қабылдайды. Ал, кезінде ала жіпті қандай мақсатта пайдаланған? Оның ырымға қандай қатысы бар? «Tansholpan»-ның тілшілері осы сұраққа жауап іздейді. Халық арасында «ала жіпті мойныңа салма», «ала жіпті аттама», «ала арқанды кеспе», «ала жіппен беліңді байлама», «ала арқанмен жылқыны арқандама», «ала арқанды далаға тастама» деген сияқты тыйымдар бар. Бұл халқымыз үшін тәрбиенің басты құралы деуге болады. Ала жіпке қатысты тыйыммен қатар ырым да жетерлік. Мысалы, жас бала тәй-тәй басып, жүруге талпыныс жасай бастаған кезде оның тұсауын ала жіппен кескен. Немесе адам ойда жоқта елсіз далада қонып қалса, ала жіппен шеңбер жасап, шеңбер ортасында таңды аттырған екен. Сонда кесіртке, жылан сияқты басқа да кесапатты жәндіктер ала жіптен өтіп, адамға жақындай алмайды. Ала жіпке қатысты басқа қандай ырым білесіз?