Осы аптада жаңа Президент Қасым-Жомарт Тоқаев Алаштың алдында ант берді

Тұтас мемлекет, 18 миллион халық  президентсіз бір түн өткеріп, сағат түскі 12-ні күтті. Сәрсенбі күні Парламент палаталарының бірлескен отырысында жаңа Президент Қасым-Жомарт Тоқаев Алаштың алдында ант берді. Алдымызда ел болашағы үшін атқарылатын ауқымды әрі күрделі жұмыстар күтіп тұр. Ең басты мұрат- Елбасының саяси және тарихи мұрасы Тәуелсіздікті сақтау және нығайту екенін айтқан Қасым-Жомарт Тоқаев «барлық күш-жігеріміді ел игіліне жұмсаймын»,- деді. Сосын ұлықтау рәсімінде Елбасының ерен қызметін әділ бағалап, бірнеше ұсыныс айтты. Оның ең соқталысы  – Астананың атауын Нұр-Сұлтан деп өзгерту. Әлбетте, Астана деген атауға үйренген құлақ пен тіл басында жатырқап, әрі-сәрі күйге түскені рас. Бірақ, уақыт өте келе жаңа атаудың да тілге де, жүрекке де, көңілге де жатталып қалатынына еш күмән жоқ. Қош. Ұсыныс қоғамда қызу талқыланғанды. Әрі көптің қолдауына ие болды. Өйткені, жазық далаға қазық қағып, оны жас қалаға, жүзіктің көзіндей бас қалаға айналдырған Назарбаев елорданың бас архитекторы екені анық.  Елорда 21 жылда жаһанның жауһар астаналарымен деңгейлесті. Саяси текетірестерге төрелік айтатын,  әлемнің кіл мықтылары келіп, келелі пікір білдіретін Күлтөбеге айналды. Қаржылық орталығы бір төбе. Сонымен, Есіл жағасындағы еңселі елорданың атауы ресми өзгерді. Кеше Мемлекет басшысы Қасым-Жомарт Тоқаев Астана қаласын Қазақстан Республикасының астанасы – Нұр-Сұлтан қаласы деп қайта атау туралы Жарлыққа қол қойды. Ал, қала әкімі Бақыт Сұлтанов «шаһар атауы өзгертілсе, шығындар минималды болады. Бюджетке айтарлықтай салмақ түспеуі тиіс. Өйткені, құжаттар жаппай ауыстырылмайды деп мәлімдеді. Сондай-ақ, елорда басшысы «Астана опера», «Астана арена» сияқты ғимараттардың да атауы өзгермейтінін айтты. Ал, қала тұрғындары бұрынғыдай астаналықтар деп  аталып, бұл сөз қолданыста қала беретінін жеткізді.