Гүлсайра Ергешова: Балаларымның азаматтығы жоқ

Мен кіммін? Қайдан келдім? Қайда барамын? Осы сұраққа жауап білетін адамның мақсаты айқын, мұраты анық болады. Қайдан шыққаныңды, қайда баратыныңды анықтау үшін ең әуелі өзіңнің кім екеніңді білу керек. «Qareket» бағдарламасының бүгінгі кейіпкері Гүлсайра Ергешова осы сауалдарға жауап іздейді. Гүлсайра 20 жыл бұрын Қырғызстаннан келіп, қазақ азаматына тұрмысқа шыққан. Осы уақыттан бері құжаттарын жасата алмай отыр. 3 ай сайын шекараға баруға мәжбүр. «1998 жылы оқу бітіріп, Қазақстанға демалыста ақша табу үшін келдім. Шілік ауданына келіп, жұмысқа кірістім. Мен барған фазенда иесінің інісі мені ұнатып, алып қашып кетті. Еліме қайтып баруға қорқып, осында қалдым. Үйлендік, екі балалы болдық. Бірақ заңды некеге тұрған жоқпыз. Бірақ уақыттан кейін күйеуімнің де, отбасының да ішетінін білдім. Бала-шағамды, мені ұра бастады. Баламды өлтіріп алмасын деп ажырасып кеттім. Кейін 2 баламен екінші рет тұрмысқа шықтым. Үшінші балама жүкті болғанда екінші күйеуім тастап кетті. Содан бері пәтер жалдап тұрамын. Қайдан жұмыс шықса, сонда барамын. Барлық жерде құжат сұрайды. Құжат жасап берем деген адамдар ақшамды алып, алдап кетті», дейді Гүлсайра Ергешова