Абзал Мырзаш: Қазақстанның өркениетті 30 елдің қатарында болуына үлесімді қосқым келеді

Бүгін елордада Мемлекет басшысы Н.Ә.Назарбаевтың қатысуымен Жастар жылы ресми түрде ашылу салтанаты өтті. «Тәуелсіздіктің ұрпақтары» атты шарада қазақстандық жастар жүзеге асырып жатқан табысты жобаларын таныстыруда. Солардың бірі – 13 жасар Абзал Мырзаш. Алматылық Абзалдың бойындағы ерекше дарыны кішкентай кезінде байқалған. Қатарластарынан асып түскен ақылды бала мектептің оқу бағдарламасын уақытынан бұрын меңгеріп шыққан. Небәрі 13 жастағы Абзал бүгінде Қазақ-Британ техникалық университеті, ақпараттық технологиялар факультетінің студенті. Елбасы тапсырмасы бойынша латын қарпіне өту мәселесі көтерілгелі бері Абзал да бұл іске кірісіп кеткен. «Латын әліпбиіне ауысу – IT технологиялық прогрестен қалыс қалмауға, елімізде әлемдік интеграцияны күшейтуде, қазақ тілін жаңғыртуға жағдай туғызады. Сондықтан, менің ұсынатын екі жобам бар. Бірінші жоба – диграфтық тәсіл арқылы компьютер клавиатурасына ыңғайлап «ABZALalphabet» деп аталатын қазақ әліпбиі. Бұл нұсқа арқылы әлемнің кез келген жерінен компьютердің стандартты ағылшын клавиатурасын пайдаланып, қазақша жазуға болады. Екінші жоба – кириллицадан латын қарпіне аударатын конвертир программа. Қазір менің бұл конвертир бағдарламам арқылы кириллицадан латын графикасына қазақ қарпіне бір минутта 1200-ден астам кітап аударуға болады. Еліміздің шынайы патриоты ретінде Қазақстанның алдыңғы қатарлы, озық технологиясы бар, ғылымы мен экономикасы дамыған өркениетті 30 елдің қатарында болуына үлесімді қосқым келеді», дейді Абзал.