Серікбол Хасан: Баладан асқан талғампаз жоқ

Балалар жазушысы, журналист Серікбол Хасан «Таңшолпан» бағдарламасында қонақта. Жуырда ол журналистика аталымы бойынша «Серпер» сыйлығын жеңіп алды. Серікбол Хасан: «Серпер» сыйлығының тарихы тың тереңде. Сондықтан, бұл марапат алда шығармашылыққа серпін береді деп ойлаймын. Мен тек қана журналистика саласына емес, балаларға өлең жазып, әдебиетке белсенді қатысып, қоғамдық жұмыстарға араласып жүрмін. Нақтырақ айтсам, балалардың шығармашылығына, оларды тәрбиелеуге, олардың шығармаларын насихаттауға көңіл аударамын. Өйткені, бала - біздің болашағымыз. «Балалар - өте талғампаз оқырман» деп айтқан екен Максим Горький. Шынымен, баладан асқан талғампаз жоқ. Мысалы, біз «Мақта қыз» ертегісін оқыған кезде ертегінің өн бойына, кейіпкерлерге қызығатынбыз. Ал, қазіргі балаларға ол ертегіні оқып берсең, сұрақ көп болады. Меніңше, заман алға жылжыды, ертегілерді заманға лайықтап жазу керек. Қазіргі балалар ақындары, жазушылары өз заманының, өзінің бала кезіндегі бастарынан өткен жағдайлары туралы жазады. Көбі қазіргі балалардың не ойлайтыны, олардың психологиясы туралы білмейді. Балалардың шығармаларын насихаттайтын басылымдарды насихаттау керек. Ондай газет-журналдар көп».