Қасым Қайсеновтің туғанына - 101 жыл

Қазақстанның Халық қаһарманы, аты аңызға айналған халқымыздың қайталанбас біртуар даңқты перзенті Қасым Қайсенов 1918 жылдың 23 сәуірінде Шығыс Қазақстан облысы, Ұлан ауданында дүниеге келген. Ол 1935 жылы 17 жасында Өскемен қаласындағы саяси-ағарту техникумына оқуға түседі. Осы жерде жұбайы Асыл апамен танысып, оқу бітіргеннен кейін 1937 жылы отбасын құрады. Ал, 1940-1941 жылы арнаулы әскери дайындық мектебінен өтіп, Оңтүстік-Батыс майданының штабына жөнелтіліп, сол жерден арнайы тапсырма алып, Украинаның басқыншылар қолында қалған жерінде партизан отрядын құру үшін жау тылына түсіріледі. 1944 жылдың аяғына дейін Молдавия, Чехословакия, Румыния жеріндегі партизан қозғалыстарына қатысады. Отряд командирі болып жүріп, жау тылында жүздеген жорықты басынан өткереді. Соғыс аяқталған соң Отанына — Қазақстанға оралып, Қазақ КСР Жоғарғы Кеңесінің Президиумы аппаратында, Қазақстан жазушылар одағында, баспа орындарында жауапты жұмыстарды атқарады. Қайсенов соғыстың қиын-қыстау кезеңін, жауынгерлердің жанқиярлық ерлігін шынайы суреттеген, оқушы жұртшылыққа кеңінен мәлім көптеген шығармалардың авторы. 1954 жылы «Жас партизандар» атты алғашқы кітабы жарық көрді. Одан кейін «Илько Витряк», «Переяслав партизандары», «Ажал аузынан», «Жау тылындағы бала», «Днепрде», «Жау тылында», «Партизан соқпақтары», тағы басқа әңгіме, очерк, повесть жинақтарын оқырманның жүрегіне жеткізді. Оның шығармалары орыс, украин, басқа да көптеген тілдерге аударылған.