6 сәуір күні Ұлттық арнадан «JańǵyryQ» жобасының тұсаукесерін көруге болады

Жақында «Qazaqstan» телеарнасы отандық әншілердің қатысуымен «JańǵyryQ» жобасын бастайды. Жоба продюсері Мақпал Жұмабай мен әнші Ербол Нариманұлы «Tansholpan»-ның қонағы болып, жаңа жобаның ерекшеліктері мен мақсаты туралы сөз қозғады. «Қазіргі уақытта қазақ өнерінде заманауи өзгерістер болып жатыр. Қоғамның ішінде жаңашылдық процестер жасайтын, ортасында жүретін адамдар болады.Біз соның ішінде болсақ деген үміті бар адамбыз. «JańǵyryQ» жобасы осындай үлкен ойдан туды. Мен өзімнің өлеңдерімді музыкаға салып орындағаныма 13 жыл болды. Өсе келе кәсіби музыкамен айналысып, топ құрып, концерт ұйымдастырып жүргенде Ұлттық арна басшысы Ерлан Тынымбайұлы авторлық музыкаға арналған жоба жасау туралы идея ұсынды. Кәсіби тұрғыда мұндай жоба жасай алатынымды түсіндім. Қазір жинаған тәжірибем мен мүмкіншіліктерім басқа жастарға көмек бере алатынын түсіндім. Бұл жоба барлығымыздың бір жерге бірігуімізге, бір мақсатқа жұмылуымызға, Қазақстандағы тың жол салып келе жатқан авторлық музыканы халыққа басқаша таныстыруға мүмкіншілік береді. «JańǵyryQ» жобасы заманауи қазақ музыкасында өз жолын салып келе жатқан авторлық музыкаға арналған. Жобаның басты ерекшелігі – толық жанды дыбыс. Қазақ телевизиясына, қазақтың қоғамдық-мәдени өміріне толық жанды дыбыс енгізгіміз келеді. Және өзіндік ойымен, өнерімен, ешкімге ұқсамай, өз жолымен жүріп келе жатқан әншілерді халыққа таныстырсақ дейміз. Сондай жастардың бірі - Ербол. Ол ұзақ жол жүріп өтті. Осындай жобаны жүзеге асыруға мүмкіндік берген Ұлттық арнаға алғысымыз шексіз», дейді Мақпал.