Толқын Сайдуова: Тележурналистикада әйел қауымына өте қиын

Қазақ журналистикасының саңылақтары кімдер? Қазіргі тағдыры қандай? 1993 жылы баспасөз саласында жұмыс істеп жүрген Толқын Сайдуова жақын құрбысының қолқалауымен Ұлттық арнаның табалдырығын аттайды. «Шапағат», «Арай», «Қайырлы таң!» бағдарламаларында жұмыс істеді. 1994 жылы аздаған үзілістен кейін «Таңшолпан» бағдарламасы қайта ашылады. Сол ашылған күннен бастап ол 8 жыл бойы таңғы бағдарламаны жүргізді. «Тележурналистикада әйел қауымына өте қиын. Өйткені жеке өміріңді ұмытасың, бар күш-жігер, ықыласыңды жұмысқа салмасаң, жұмысың көрінбейді. Бір күн жұмыстан қалсаң, саптан шыққан сарбаз секілді болып қаласың», - дейді Толқын Сайдуова. 1997 жылы белгілі журналист Марат Тоқашбаевтың шақыртуымен Ұлттық арнаның таңғы бағдарламалар бірлестігіне қазіргі «Айқын» газетінің тілшісі журналист Жомарт Молдахмет жұмысқа орналасады. Жомарт Молдахмет бас редактордың орынбасары қызметін атқара жүріп, тілші де болды. Нұрғали Нұсіпжанов, Майра Мұхамед сынды тұлғалармен сұхбат жүргізді. Бүгінде белгілі қобызшы Ақерке Тәжібаева туралы алғаш болып бейнематериал дайындаған да осы кісі. Расында да қазақ журналистикасы осындай азаматтардың жанкешті еңбегінің арқасында бүгінгі биігіне жетіп отыр. «Бір жеңнен қол шығара ұжымдаса еңбек еттік. Сол жылдары бізбен бірге Бақыт Қойшыбаев, Әлия Қарамендина, Күнсұлу Тұрғынбекқызы, Бақыт Жағыппарұлы секілді азаматтар жұмыс істеді. Уақытпен санаспадық. Түнгі 3-ке дейін жұмыс істеген күндер болды. Себебі техниканың қуаты шамалы еді. Сондағы мақсатымыз - қазақ тележурналистикасының ақсап қалмауы, халыққа жаңалық жеткізу. Қазіргі тележурналистикадағы жастар бақытты», - дейді Жомарт Молдахмет.